LIBRO SONORO

QUELLA TROMBA DI LATTA DEL CONFINE ORIENTALE ITALIANO - LIBRO SONORO. El libro de un musicista no podeva no esser un libro che sona! Drento el libro xe un cd con 20 cansoni, o forsi xe più elegante e meio dir "songs". Mi li ciamo "brani musicali" perchè no xe cansonete per sanremo. Le gavemo interpretade come se interpretà la "musica d'arte" e per questo ghe vol saver sonar ben o gaver una bela vose e cantar ben. Go ciolto in sti ani, nel Mitteleuropa Ensemble (la mia clapa) 4 cantanti che dir brave xe poco. Quando le ascolterè vederè che qua drento xe tuta la mia vita nela musica. Qualchedun xe "inedito", che vol dir novo, altri i fa parte de la mia "discografia" dal 1983 al 2014 (30 ani). Xe tanti sti 20 brani e no ghe stava altri nel cd altrimenti li gaveria messi e go dovudo far una selezion. Volè saver qualche titolo? Solo qualche titolo perché se no no comprè el libro! El primo no podeva esser che "Forse un giorno si racconterà di un popolo ...", poi troverè "T.L.T. - Territorio Libero di Trieste", poi "Il campo profughi - Le baracche di Padriciano" e xe i primi 3 del disco, e li go fati mi, nota per nota. Dopo anche xe brani de autori dell'esodo istrian come Sergio Endrigo e troverè "1947" e "Coreva andar pel mondo" de Piero Soffici, e altri tochi che xe cansoni popolari del'Istria che no se senti tanto in giro come "Donna Lombarda" ma anche tochi de musica klezmer (la musica popolar dei ebrei), tochi bei mossi che fa allegria perchè go portà in Italia da New York sta musica che no sonava nissun, dopo li go sonadi anche con Moni Ovadia in giro pel mondo. Go messo anche una canson de Bruno Bidolì "Eterno ritornello" più conossuda a Trieste come "Te voio ben" e una marcia come "Alte Kameraden" assai ben sonada da 14 musicisti che go pescà tra i zovini musicisti quando che son rivà a Milano da Trieste. Qualchedun xe anche diventà famoso. Ve digo anche el nome delle 4 cantanti che sentirè (tutte soprani): Diane Rama, Anne Banks, Olatz Gorrotxategi, Sabrina Sparti e tutte con vose fora del comun. Cossa volè farghe go el balin che me piasi solo cantanti vere, che canta come se devi. QUELLA TROMBA DI LATTA del confine orientale italiano - Libro e cd allegato al libro. LUGLIO EDITORE - Trieste

Prima edizione 2014.